خريبكة، عاصمة الفساد…فاصل و نواصل…

السيد وزير الداخلية، واش نتا معانا و لا مع غانا ؟! شحال من حجة خاص الفرشة تعطيكم باش تحركو ؟

شوف نعام سيدي، رئيس جماعة الكفاف كايتحدى الحكامة وحرد مالية الجماعة ودار النية في بيع سوارت الدور السكنية المملوكة للجماعة…و العامل زعيم الفساد بالاقليم فراسو…

اذا حرف من هاذشي كذوب اسي الوزير و الله لا باقي سمعتي حسنا…

السي الرايس عبد الاله بن حدو باع ساروت الدار اللي تطرقنا ليها في منشور سابق، و اللي تهدمت الجدران الداخلية ديالها وتغير تصميمها ، وتفتحت فيها مكازة بدون ترخيص ..

هاد الأسبوع عاود ثاني تباع ساروت الدار ذات الترقيم 03\ 27 اللي كاريها مدير الجماعة السابق ، واللي سبق ليه باع نفس الساروت ونصب على الموظفة زميلتو المرحومة في 06 المليون ، وتسبب في وفاتها بالفقصة (كنا كتبنا على قصتها اي الصفحة المليونية قيد حياتها) ، وتسبب في إعفاء الموظف اللي رفض يسهل عملية بيع ثانية خارج منطوق مواد القانون19-57 ( الواقعة تم التطرق لها في الشكاية المؤرخة بتاريخ 04\07\2022 الشكاية في تعليق أسفل المنشور.

مدير الجماعة السابق باع الساروت من جديد ب 12 المليون وباغي الجماعة توثق العقد مع الضحية الجديد ، مع العلم أنه إلى حدود دجنبر 2021 كانت كاتسالو الجماعة 59100,00 درهم كمستحقات غيرمستخلصة منذ يوليوز 2005..

ولأن الكميلة بنينة، اعفى الرئيس الموظف بشكل تعسفي من بعد ماطلب من الرئيس يفسخ العقود مع غير الملتزمين بأداء الوجيبة الكرائية، ويستخلص بالطرق القانونية المستحقات اللي سقط جزء كبير منها بالتقادم ، و يفسخ مع اللي غيرو تصميم الدكاكين والدور السكنية باعتبار العقود فيها بنود كاتنص على ذلك ..

بالمناسبة علاش أ الرايس مافسختيش عقود كراء الدكاكين المضمومة لإحداث مقهى عشوائي اللي باقي تاينشط في دكانين لحد الساعة ؟! بعد إرجاع دكانين آخرين لحالتهم الأصلية ، علما أنها كاتنص على الفسخ في حالة عدم تأدية الوجيبة وتغير تصميم الدكاكين، نفس الشيء تايسري على الدار اللي تحولت لمكازة ومخزن بشكل عشوائي ، اللي تباع ساروتها ب 9 المليون ، ودار المدير السابق وخليتيه كايتلاعب بالملك الخاص للجماعة ..

الباقي استخلاصه وصل تقريبا ل 160 مليون، وأغلبية المكترين كارين ب 100 درهم للدكان و200 درهم للدار وماكايخلصوش وباغين يبيعو السوارت في النوار، علما أن القانون 19 -57 كاينص في بابو الثالث المادة 36 ومايتبعها على المزايدة العمومية ومداولات المجلس ، وكناش تحملات مصادق عليهما واحترام منطوق النصوص التفصيلية ..

الرئيس لجأ مؤخرا لحيلة المزايدات الصورية ، واللي ماكاتساهمش في تثمين الوعاء العقاري للجماعة (السكن الوظيفي لحارس المحجز ، محل الحلاقة اللي تايستغلو أحد الأعضاء) ..واش معقول يتكراو محلات تجارية ودور سكنية ب 100 ولا 200 ؟؟! علاش لم يتك فتح مزايدة ؟! كاين اللي باغي يكري الدار ب 1000 درهم.

بالمناسبة الدكان رقم 06 اللي عقد كرائه باسم تعاونية الوفاء اللي كايترأسها نائبك الأول واللي مازال ساري لحد الساعة ، راه كراه ماخالصش تاهوا منذ يوليوز 2012 ..

الشكاية والباقي إستخلاصه في التعليق أسفل المنشور…

يتبع…

سير على بركة الله….