ياواراها مثقوبة…

نهار الاجتماع 11 يونيو 2023 هو النهار المشؤوم عند أمزال الرئيس الغير شرعي للجامعة المليكة للشطرنج المدان وطنيا و دوليا باحكام و قرارات رسمية، فاش أغمق على اعضاء المكتب المديري بالتصاور في الحيط، وقال ليهم هاذي هي المصادقة على التقرير المالي والادبي لموسم 22/21 بدون مناقشته بلا مايطلعوا و لا بتسلموا نسخة التقريرين حسب القانون ، لي قال ليهم عليه مازال ماوجادش لوجود بعض الاوراق عند المحاسب، لي هو أصلا غير معتمد حسب بحث الفرقة الوطنية ، وعندو سوابق في التزوير وبيع الشواهد، بحالوا بحال ابا صطوف…

هنا أبدا الشك كيدخل لبعض اعضاء المكتب المديري لي طلبوا نسخة من التقريرين عبر الايميل الرسمي للجامعة ، فكان الجواب تجاهلهم من طرف خائن الأمانة والمزور العالمي، فتمت مراسلة السيد مدير الرياضات لي دخل على الخط ، وأعلن على اجتماع رسمي مع اعضاء المكتب لي كان أغلبهم جاي حافظ الدور ديالو بإمتياز ، هاذ الاجتماع لي تم فيه تأجيل الجمع العام المزمع تنظيمه يوم 16 يوليوز 2023 ، من طرف المدير لي تأكد أن أمزال كان خارق لقوانين الجموع العامة.

الغريب في الأمر و رغم هاذ المشاكل والخروقات كاملة، قدر يأخذ المنحة السنوية موقع عليها السيد الوزير شكيب بن موسى (انظر التعليق)، رغم عدم احترامه لعقدة الاهداف لي صرف فلوسها كاملة في الخوا الخاوي، و مرة أخرى خائن الأمانة يستفيذ من 130 مليون منحة هاذ العام، لي زادها على 580 مليون قديمة لي تحكم عليها بالسجن (انظر صور من الحكم فالتعليق)، وكلشي هادشي من المال العام، و زاد شحط معاها 30 مليون ديال الشطرنج المدرسي ، لي خلص بيها الفندق ديال أكادير ملي دفعوا ليه الشيك وجاو البوليس اعتقلوا مراتو من المؤسسة لي كاتقري فيها…

كل هاذ الفضائح ديال امزال أوكيجي كيوجد باش ينظم دوري دولي في الشطرنج سماه جائزة محمد السادس بتعاون مع أحد المغاربة المقيمين في كندا يدعى سليم بلقاضي، لي غالبا ماعارف والو على خائن الأمانة، هاذشي كامل باش إلمع الصورة ديالو بعدما حكمت عليه المحكمة بإسم صاحب الجلالة لستة أشهر سجنا موقوفة التنفيذ، بتهمة التزوير وخيانة الأمانة.

كيفاش أقنع السيد باش يحط أكثر من 100 مليون في هاذ الدوري المشبوه ؟ ربما بذاك الدينار لي فجبهتو ؟! او باسم الدوري لي نسبو لملك البلاد ؟

نقطة أخرى مهمة عند أمزال، انه كيمنع جميع الأندية النشيطة والمعارضة من الانخراط في الجامعة بحجة أن الجامعة دارو، وكيحلف والله لا أدخل ليها شي واحد ، وكيبني كذلك المنع ديالو على استشارة المحامي ديالوا الاستاذ محمد برݣاش، لي كيتخلص من أموال الجامعة ، لي غاذي نرجعوا ليه بحول الله نشوفوا فين كتمشي هاذ المنحة وشكون لي كايستفذ منها ….

مازال مثقوبة أومازادت…

سير على بركة الله….