المحكمة الابتدائية لسيدي قاسم، واناري ميمتي على قضاء بلانا بيه الله…

واسيادنا اقسم بالله الا وصف مثقوبة كياخذ جميع ابعادو و معانيه مع هاذ القصة….والعادااااااو…

واش عقلتو على واحد الحقوقي من الخنيشات جابو عندو الصحفي ولد الخنيشات تاهوا حميد المهداوي تقريبا شي عام دابا، ذاكشي لي قال فذيك الحلقة كيوقف الشعر ! و كلشي بالحجج، و كنا كتبنا عليه اكثر من مرة فالمليونية و ما تبعها من صفحات جديدة…

الرايس و ولدو مورطين في تهم ثقيلة، بيع ممتلكات الجماعة، سرقة ميزانية دار الطالبة، السطو على الأراضي و خلق و بيع تجزئات سرية عشوائية، و رشوة لجان المراقبة و علاقة مشبوهة بالعامل لي مخليهم يريتلو فالجماعة…

في ملف بيع ممتلكات الجماعة، تم الحكم على رئيس جماعة الخنيشات بوعبيد بوعبيد بأربعة أشهر موقوفة التنفيذ وغرامة مالية قدرها 200 درهم، هذا واحد باع الحوانت ديال الجماعة و كاين الشهود و باقي المحلات عند لي شراهم و معترف امام قاضي التحقيق انه شراهم من عند الرايس حيث كيتسالو فلوس و عاود باعهم باربعين مليون، خذا أربعة أشهر سورسي، من 2018 و هوما يجرجرو فالملف…10212 / 2102 / 2023.

في ملف التجزئة السرية، خذا نعام سيدي البراءة، رغم ان التجزئة تتواجد بالخنيشات لدابا ومعروفة ما ضربها زلزال ما غبرت… عا تا ناض و قسم عقارات بدون اذن، و دار جميع التصاميم والرخص بإسم أبناءه وزوجته وزوجة ابنه، هالعار الا ما تمشي شي لجنة و و لا ما لقاتش مجموعة سكنية بنيت بشكل عشوائي مازال شاهدة على الجر.يمة… ديوني انا للحيس، الحماق صافي….

اه و الواعرة شناهيا، ذاك الحقوقي لي جابو المهداوي المدعو علي نانا ضربوه بسنة حبسا نافذا حيث دوى على هاذشي و اكثر مما يقع في جماعة الخنيشات….و ما نشر ما شهر ما كتب…..

الغريب هو ان سي المهداوي ما يدويش على هاذ الفض.يحة اولا من باب انها منطقتو و كينحدر منها و كان يدير فيديوهات من قلب الخنيشات فواحد العهد هاذي سنوات، ثم كذلك بحكم ان السيد لي جابو يدوي ضربوه بعام نافذ ! واخا غير تضامنا معاه تاهوا ! كيما كيتضامن مع الطواجني و الغد.ار المديمي…ما بقاش باغي تايجاوب السيد…ربما مشغول الله يحسن العوان….

سير على بركة الله….