امانديس طنجة، زريبة الفساد…

مرة أخرى مع سردينات جداد من قاع الشواري، مزال كنتسناو التحقيقات ديال لالا أمانديس، لي عمرهم ماغادي يكونو، حيت حتى ذاك لي غيدير تحقيق، خاصو هو بنفسو لي يحقق معاه، المهم ها شي بركة أخرى من قاع الشواري …

1- سنة 2017، قهوة فحي السانية حومة الواد، مولاها مبرونشي ديريكت تحت الأرض من القادوس ديال 300، وبقدرة قادر ولا كيزود حومة على قدها 16 دار من الما لي سارق، ونهار حصلوه الناس ديال الفرود (مراقبة الغش)، كان معاهم المستخدمين ديال الديتيكسيون .

2- سنة 2020، فيلا فخمة فالغندوري، مبرونشي ديريكت تحت الأرض من القادوس ديال 110، نهار حصلات كان الشهود عمال شركة واخدة المارشي cadre من أمانديس ديال الما، وهوما لي حفرو على القادوس، حصلو مول الفيلا سارق الدولة فالما و معفي من الخلاص عكس بقية الشعب.

3- سنة 2019، فيلا في ملكية طبيب في فدان شابو الحومة السفلية، حصل مبرونشي ديريكت الفيلا وزيد عليها مسبح، كلشي بيليكي.

4 -سنة 2019، مقهى ومطعم فالفيلا لي مقابلة لقصر الضيافة طريق طنجة البالية، حصلات مبرونشية ديريكت كذلك.

5- سنة 2021، عمارة مقابل الواد الجديد، 32 برونشمون ديريكت بلا حسيب ولا رقيب، كلها معفية من تأدية واجب الدولة، وتعيش المواطنة بحالها بحال اولاد الشعب.

6- سنة 2018، لافاج ديال السيارات مقابل للمقهى المعروفة فمالاباطا سميتها أرينا، حصل سارق الما ديريكت تاهوا كيخلص التنبر الأزرق ويدوز.

7- سنة 2018، عمارة مقابلة مع مركب الربيع، تاهيا مبرونشية ديريكت، حصلوها كتعمر حتى المسبح التابع ليها و بير…

8- سنة 2019، لافاج سيارات اخر فطريق الكرنة، مبرونشي ديريكت، حصل وتفاهم تاهوا تحت الطابلة.

9- سنة 2019، حي المجاهدين شارع مولاي سليمان، 3 فيلات مبرونشيين تحت الأرض، وماعندك علاش تخلص أمانديس، يتلاقا معاكم المسؤول وشريكو قدام القهوة المعلومة، وتما كحب ليه وسير تضيم.

10- و ختام العشرة مسك، سنوات 2016 و 2017 و 2018، حي جامع المقراع، 82 فيلا كلها مبرونشية ديريكت وبالمجان، خلص غير مول سكودا صاحب مقولة “و الله لا ضربتي الضربة واخا تمشي عند الملك” صاحب التسجيل المعروف إسماعيل الركراكي، والشريك ديالو حمزة السالمون، وهانتا ناضي، هاد الفيلات حصلو بالضبط ف (تشيكافيا ، القادرية، الكريكيت، الصنوبر ، بوبانة أطلسية).

هادو 10 سردينات خ*نزين بدرجة روكانات، وما زال عند الفرشة ماتزيد تفرش فهاد الزريبة، ومزال نفضحو المسؤولين فهاد الشركة بعشرات التسجيلات الصوتية ومئات الأدلة… ولي جاي أخ*نز من لي فات… هلكتو البلاد والعباد، ومزال عماريات الفاسدين والرشايوية جداد غايطلعو فعمارية الفرشة في القريب بإذن الله…

سييير على بركة الله….