بودريقة هرب !

البارح الأحد قلت نديكونيكتا شوية بعد اسبوع مرهق، المساء ارجعت ضربت دورة لقيت الدنيا مقلوبة على بودريقة، شي وداديين الله يهديهم قاليك تفرشتي ما دويتيش عليه، مشيت نبحث اش واقع، لقيت خبر العملية على القلب فلندن، و لقيت حملة فالفايس يتزعمها بعض الوداديين كتقول راه هرب !

لا باس نذكر هاذ الإخوان، اولا اذا كاين احتمال و لو واحد المئة ان خبر العملية صحيح، فحنا مغاربة و ولاد الناس، ما كنشمتو ما كنتشفاو لا فالمو.ت و لا فالمرض و لا فاي قدر رباني، ثم ثانيا و الاهم، لي دار احسن منا ضد بودريقة يتفضل يورينا ! الضواسا لي نشرنا على بودريقة كلهم عامرين و بحجج، من قضية حادة و البتول لي تشد فيها خوه عبد الله و لي بالمناسبة كنا اول من أعلن خبر اعتقالو و فصلنا فالقضية في حملة منشورات بالتدقيق الممل، مرورا بقضية خبيزة اليهودي لي بفضل الله ثم منشوراتنا تم إنقاذ عشرات المواطنين من الطرد من منازل ساكنين فيها منذ عشرات السنين، ثم قضية تذاكر المونديال، الخ الخ….

و حنا باقين على العهد، لي عندو شي ملفات بحجج باقي ما نشرناها عليه يمدنا بيها و يختبرنا، اما التكهنات و الافتراضات و ضغط بعض الوداديين الله يهديهم لن تغير من طريقة عملنا، و قصة الناصري خير دليل، ملي كنا نجلدو فبودريقة، بعض الرجاويين كانوا كيضغطو علينا بنفس الطريقة باش نتكلمو على الناصري، و كان ديما ردنا واضح، نحتاج حجج باش نتكلمو…

سير على بركة الله…