حصري،

لاجودان و قصة ورث 12 مليار…الحلقة الأولى….

لاجودان ديال سميمو حسن البرنوسي، نجم الفرشة الجديد لي قدمناه في منشور سابق قبل يومين، غادي يطول معانا المقام، لانه فعلا، ماشي مجازا و لا مبالغة، حلقة مهمة في سلسلة الفساد لي ضارب اقليم الصويرة…

كل الحجج و الوثائق في التعليق…

أواخر سنة 2022 المدعو عبد الكريم بن طالب (الصورة فالتعليق) هو و ستة اشخاص، جابو طراكس من حدى لا بريكاد د سميمو و هجموا على السيدة المشتكية الحاجة فاضمة ابناي صاحبة 12 مليار لي شرت ليها فالتدوينة السابقة، ام مسنة بلغت العقد التاسع من العمر، و لي هي تكون خالة البرلمانية و عضو الجهة اخشخوش، باش يدوزو الطريق صحة فوق ارضها، و لولا تدخل ابنها انذاك و الشكاية لي توضعت ضد المهاجمين و لي نصفت السيدة و ادانت العصابة بالحبس السورسي اربع شهور و غرامة عشرين الف درهم، لتم لهم المراد من ذاك التاريخ… ياك عرفتيني علاش داوي اسي لاجودان ؟

بالامارة الشكاية ملي دازت عند السيد الوكيل، المشتكي طلب منو يكلف بيها لابيجي ديال تمنارت عوض درك سميمو، لانه فذات الوقت عندك يد مع ما*فيا عضو الجهة و رئيس الفريق التقدمي جهة مراكش يوسف اخشخوش ابن اخت السيدة المشتكية، و لي كيخطط مع خوالو باش يحرموها من أرضها و ورثها لي بالغ على اقل تقدير 12 مليار، و هاذ الموضوع غادي نفصلو فيه كما يجب في القريب ان شاء الله، للإشارة اخشخوش هو لي مع لاجودان فالصورة، ما كيخبي عليه والو، عشران قداام…

بعد شهرين بالضبط من هاذ الواقعة، و تحديدا يوم 10 فبراير من هاذ السنة، نفس العص*ابة غادي ترجع و باقي الحكم السورسي ساري المفعول، و هجموا على السيدة هاذ المرة ماشي بطراكس و لكن بسيارة زعيم العصابة الخاصة عبد الكريم بن طالب، صورة سيارتو و هي حاصلة وسط ارض السيدة متلبس فالتعليق، و هرسو البيبان و وحلت ليه السيارة لي هي كاطكاط فالغيس كما ترون، و الأرض محروثة و ما كاينش اثر الطريق، و العص*ابة تدعي انها كاينة طريق عمومية.

حضر لاجودان تاهوا و دار تصميم ديالو بخط يديه ادعى فيه انه كاينة طريق فذيك الأرض وسط ملك المشتكية صاحبة الأرض، علما اخواني الفرشاويين انه درك تمنارت دايرين عكس داكشي لي داير هاذ لاجودان الش*فار، و غانخلي ليكم فالتعليق تصميم درك تمنارت و تصميم درك سميمو في شخص هاذ الشلاهبي و نتوما و من يهمهم الامر، لكم واسع التظر….

كيفاش رد المهاجمين لي دانتهم المحمكة و حكمها كان ساري المفعول وقت لي دارو هاذ الجر*يمة هو واياهم، و كيفاش ردهم اصحاب حق و هوما لي حاطين شكاية ضد ابنها لي تعرض ليهم فالملك ديالو، من جناية ديال الهجوم على ملك الغير رغم ان القضية ثابتة بتلبس و السيارة بقات حاصلة فالغيس كدليل ضد العص*ابة، الى جنحة ديال الس*ب و الشتم و إغلاق طريق ضد ابن السيدة المشتكية صاحبة الأرض،كيفاش رد ذوك لي كانو هاجمين و عليهم حكم سورسي على نفس الفعل الجرمي و نفس الارض و نفس المدخل، ردهم شهود بلا حشمة لا حيا، حتى تسبب في فقدان السيدة لبصرها من كثرة الدموع في آخر ايامها و و في شللها و فقدانها للقدرة على المشي …

رقم الملف فالمحكمة لي كيروج فالمجكمة لدابا بناء على وقائع كاذبة من صنع لاجودان، و لي راجل يخرج يكذبنا و يواجهنا…

رقم الملف…527/2106/2023…

يتبع…

سير على بركة الله…

عبد الكريم بن الطالب، لي جاب الطراكس اول مرة و جاب السيارة لي حصلت ثاني مرة، المحكوم باربع أشهر موقوفة التنفيذ و عشرين الف درهم غرامة

السيارة و هي حاصلة وسط الغيس متلبسة على أرض السيدة المشتكية

تصميم لاجودان رئيس مركز سميمو الكاذب

تصميم درك تمنار الصحيح