الفرشة – Lfercha واجبنا ضد الفساد
المجلس و البرلماني مول الجاموس و الفراشة كيتنافسو شكون ينهب أكثر و السلطة كتفرج…
الرئيس يخرق القانون و يفصلو على هواه باش يضرب الكموسة على ظهر برنامج و قوانين التهيئة، لانه في الأصل منعش عقاري كيضرب على كبالتو، كتسولو كيقوليك “العيب و العار لا لقيتيني واكل المال العام و لا ديت ديال الناس”.اما قضية السوق لي باغين يرحلو، هاذي ما غايحسو بيها البنوريين تا لي دا شي داه…
النواب ديالو كلهم خروقات و اختلاسات و نصب، وا غير بيناتهم النائب الثاني فاتخ النائب الأول ناصب عليه ف 700 مليون باقي هارب ليه بيها لدابا.
و النايب الثاني لي ما كيسحاش، ماشي من الطاسة، اقصد من الغبرة، كلو مصايب و نصب على عباد الله و على الدولة، آخرها موضوع هاذ الصورة النيت، البالكو لي طاح على عباد الله فنهار رمضان و حفظ ربي ما وقعت شي فاجعة، خصوصا ان تحت البالكو كاين حانوت…
و شكون المنعش لي بنا ؟ هو المستشار الجماعي النايب ديال الرئيس !!! و اش دارو معاه ؟ والو ! سولنا الرايس و سولنا النايب المنعش، قالو لينا كيف تخرج الخبرة ديال lpee نرسلها ليك !
زيد مصايب النصب على الدولة و عباد الله ديال مواطنين كيستغل ضعفهم ياخذ من عندهم فلوس يسكنهم فالسكن الاقتصادي و يخدم بيها و ما يتكاتبش معاهم، ينصب عليهم و على البنك و على الدولة…
ايوا و البرلماني مول الجاموس و الفراشة هذاك راكم عرفتوه مزيان دابا بفضل الفرشة بعد الله، تزوير و اختلاس و نصب و خروقات بالعلالي، يخطف الاراضي لعباد الله صحة و يدوز منها الازقة صحة ضدا على القانون و يزور و يضرب و يجرح … فصلنا فجرائمو بالحجة و الدليل، و الأخبار فراسكم، را مازال يتبورد…
المهم للقصة بقية، مازال نفصل ليكم بالاسم و الصورة لكل قندوح فيهم كما عودناكم…
بونوي…
سير على بركة الله..
