علاش باشوات الزمامرة ماكيطولوش فيها و لي جا كيهرب ؟!

الفرشة جابت ليكم أخبارهم….

علاقه الفرعون عبد السلام بلقشور مول النافورات البرلماني و عضو الجهة و رئيس العصبة الاحترافيه ووووو المستقيل من رئاسة الجماعة، مع رجال السلطة الباشوات كانت دائما متوتره، لذلك لا احد منهم استمر اكثر من سنتين على راس الباشاويه.

محمد النويتي (صورة بمين أعلى) تعين في 2015 وحاول الفرعون استغلالو في ضرب الخصوم السياسيين ديال درب الجران اللي ما صوتوش عليه في الانتخابات ديال 2016، وذلك بحرمانهم من البقع المخصصه لهم في اطار عمليه إعادة إسكان المستفيدين من تجزئة القدس، لعل ابرزهم ولد عمو جلال بلقشور اللي قام واحد النهار بوقفة احتجاجية أمام مقر العصبة الوطنية لكرة القدم، هاد العملية خلقات مشاكل كثيرة للباشا وما رضاش يكون عصا في يد الفرعون لذلك طلب التنقيل ديالو لمدينة العرائش في 2018.

وجا من بعدو السيد دادا الباشا (صورة يمين وسط) اللي حاول الفرعون يضرب بيه أي واحد خرج من دائرة القطيع خاصة أن في فترة الحجر الصحي اللي عرفاتها بلادنا و العالم كامل في 2020 تم فبركة العديد من القضايا ضد النشطاء السياسيين والنقابيين والجمعويين، أكثر من عشر قضايا توبع فيها ابرياء لا لشيء سوى لأنهم قالوا لا للفساد والاستبداد لي كيمارسو فرعون الزمامرة، و لعل ابرزهم كان الأستاذ موسى مريد الكاتب الإقليمي لحزب اليسار الاشتراكي الموحد.
صعوبة الموقف و الاصطدام مع الساكنة ورفض الاستمرار في هكذا ظروف خلات الباشا يطلب تاهوا التنقيل ديالو لمدينة دار بوعزه في سنة 2020.

السنة الموالية 2021 كانت سنة الانتخابات، تم تعويض الباشا الهارب من مكر و فرعنة بلقشور بالباشا عمر الشريف (صورة يمين اسفل)، ولأن الفرعون طوال الفترات السابقة كان مسيطر بشكل كامل على المجلس الجماعي، 19عضو كلهم من الموالين ولا صوت واحد معارض، فاعتبر أن صعود خمسة أعضاء معارضين في انتخابات 2021 ماكانش تكون لأن الباشا ما مشاش معاه فالخط !!!
هاد الخمسة ديال الاعضاء دارو ليه الحلاقم كل دورة ولات عندو بحال يوم الحساب، الشيء اللي خلاه يحاول ينتقم منهم عن طريق تحرير محاضر مخالفات ديال التعمير للناس اللي صوتو عليهوم.

اكثر من 40 شخص يعني سكان الحي بأكمله، ولأن الباشا ماشي من النوع اللي كايخضع “خاصة وأنه سبق لو توقف عن العمل لمدة سنة بسبب تدوينة على حسابه الفايسبوكي قال فيها كلمة حق في وجه حكومة بأكملها ” فبلقشور مغاديش يخلعو ورفض طلب الرئيس بمتابعة الساكنة بحجة أن جميع المخالفات قديمة التاريخ، الشيء اللي جعل الفرعون يحاول يبحث لو عن أية مكيدة لتنقيله هو الآخر.

في واحد الدورة ديال المجلس وجه الرئيس خطاب للباشا بطريقة متعجرفة قائلا .. السي الباشا المدينة غرقات بالكرارس يقصد الباعة المتجولين وكانطلب منك تقوم بالواجب ديالم في تحرير الملك العمومي، وبجرأة رد عليه فين بغيتي نديهوم 170 عربة يعني 170 أسرة ما يمكن لي نحول مشكل اجتماعي الى مشكل أمني السي الرئيس، كنطلب منك بصفتي سلطة الوصاية تخرج مشروع السوق المغطى إلى الوجود مادام الوعاء العقاري موجود والتصميم مصادق عليه والغلاف المالي متوفر دير خدمتك وندير خدمتي.

بلقشور بقى غير حال فمو مصدوم ولكن بدات الضغوطات النفسية وعرقلة عمل السلطه مع بعض ضعاف النفوس في تلك الرقعة الدكالية ضد الباشا، الشيء اللي دفعو انه يطلب من وزارة الداخلية يا إما تنقيله أو إعفاؤه وهو ماستجابت له الوزارة بقرار استثنائي اسبوع واحد من بعد الحركة الانتقاليه ديال رجال السلطه في 2021، وتم تنقيله لمدينة الوطية إقليم طانطان.

في حفل التوديع ديالو قال للحاضرين نخدم كابران بالكركرات ولا نعيش مذلول مع واحد مكايخافش الله عندو مصالحو الخاصة أولى من خدمة رعايا صاحب الجلالة نصره الله.

سير على بركة الله….

شوف شوف ايها الشعب الزموري شكان يدير الفرعون