الفرشة – Lfercha واجبنا ضد الفساد
كتعرفوها دابا مزيان بعد ما طلعناها للعمارية عدة مرات و كل مرة بالحجة والدليل، و تاكد صحة كل ما نشرنا و اكثر من بعد ما جاو لجان التفتيش للجماعة ، لجنة مكونة من قاضيين تابعين للمجلس الجهوي للحسابات ولجنة مكونة من أربع مفتشين تابعة لوزارة الداخلية، وبالفعل الافتحاص شمل مجموعة من الملفات والصفقات المشبوهة لي كانت موضوع منشوراتنا و شكايات من طرف بعض أعضاء المجلس موجهة لرئيس النيابة العامة وللوكيل العام و لوكيل الملك بابتدائية ابن جرير…
تكلمنا بالحجج على فdيحة الديون لي خلصت الهيشة فوق 450 مليون سنتيم لفائدة شركة التأمينات اكسا بعد ما سحبو منها الاعتماد بسبب خيانة الامانة، كانت تخلص من عند عباد الله و تاكل فلوسهم، منين جاتك 450 مليون لي فكاتك من الحبس فالدقيقة 90 ؟
ماخلصتيهاش من صفقة خردة الشاحنات المليارية، جوج شاحنات منهم كل وحدة فيهم كتسوى 190 مليون باقين شادين بلايصهم بلافايدة عامين دبا ؟! المبلغ الإجمالي الصفقة فوق مليار و نص…
تكلمنا على صفقة السوق لي كنتي باغا تدوزي للفنادقية تريكة امين لمدة عشرين عام قبل ما نوضو عليك الزكا، تكلمنا على تراجع مداخيل السوق لي كيوصلك منو حقك من السوق للسوق مع الصباح من عند وكيل المداخيل..
تكلمنا على القفف الرمضانية و المواد الغذائية لي بدلتي وفرضتي على مول الصفقة ديال اليوسفية 50درهم في القفة…
تكلمنا على الطفلة اليتيمة لي ماتت مسكينة بسبب حذف ميزانية علاج مرضى الجمعية لي كتتراسها السيدة انتقاما لراجلك موظف المحكمة حيث عندو حساب مع السيدة، و تكلمنا على الفيلا لي شريتي بعدما كنتي تسكني فالسطح عند شيخك، و على مصاريف دراسة اولادك و على السمسار راجلك منين ليه السيارة اخر ماكاين و مصاريف القصاير و الطاسا كل نهار … وزيد وزيد…
و لا كذبنا عليك فشي وحدة فهاذ المصايب لا حنا و لا الاعضاء الشرفاء لي معاك و لا نشطاء و لا حتى السلطة المحلية لي وصلتي معاها للحر.ب المباشرة، اخرجي انفي و جاوبي على راسك عوض ما تقلبي على مالينوات لا اثر لهم و لا تأثير و لا وجه و لا مصداقية و لا ذمة يحشمو عليها…
والغالب الله، حنا درنا خدمتنا ، المجتمع المدني المحلي كلو عاق بيك و داير خدمتو فالعموم و كيفضحك يوميا باللايفات و التدوينات و والوقفات…واللجان تاهيا دارت خدمتها على ما يبدو،…خاص غا النتيجة تبان والجهات المعنية تدير خدمتها، غا باش نعرفو واش نغسلو يدينا على دولة الحق و القانون تا الكتاف و لا غير تالمرفق…
سير على بركة الله…
