فين ما كانشوف هاذ الصورة ، تانحس بأن هاد الجويجة (الزوج) بغاو يقولو شي حاجة للمغاربة اللي صوتو عليهم واللي ماصوتوش ..

هاد الجويجة فاش يخرجو عبر القنوات الرسمية في بيان للحكومة ويقولو للمغاربة اللي لازم يتقال ، في التصريح الحكومي ، فضلو يحطو يديهم على الصمطة على لبزيم ياربي السلامة ، ماشي باش يزيروها لأنها مزيرة أصلا ، ولكن باش يحلوها وماشي بعيد يطيحو علينا السراول ..

وباش مانضلموهمش غادين نقراو الصورة بحكم اننا كلنا مسكين بمغرفة وحدة وحرايفية :

– تزيار الصمطة والتقشف إحتمال ضعيف كايقصيه ان الصمطة مزيرة في التقبة الاخيرة ، وكانضن غادين نسخنو مشوا باش نتقبو ، وكاتقصيه الضحكة ديال الجويجة ، حيت التزيار عندو لغتو اللي ماكاتقالش بحزام اخنوش والسيهم وهبي .

– كايبقى حلان الصمطة، واللي بدورو تايعني جوج (من الجويجة) ديال الإحتمالات :

1- باغين يصوطو عباد الله وهاد الشي جاي من حرص راس الحكومة يعاود الترابي للمغاربة ، وهو اللي شفناه في الفلاقة اللي كلاتها القدرة الشرائية للمواطن وكانظن راكم دقتو منها كاملين .

2- الإحتمال الثاني وهو اللي وارد بشكل كبير أن الجويجة بغات تنزل السراول علينا ، بغاو يتعراو ، باش يبداو موسم الطرادة ، بغاو يقولو لينا :أجيو حصلتو..

إيوا يا الفحولة راحنا شادين النوبة ، ومعاها لوضو بالمعقمات باش ماتعاداوش لينا بالأوميشعيبة ، ونحافظو عليكم كثروة في هاذ لبلاد ، لهلا يخطيكم علينا يا صحاب لحيا ولوقر..

رحم الله السي اليوسفي كان بحياه ، وحافظ على حياء المسؤولين ..

سير على بركة الله…