الفرشة – Lfercha واجبنا ضد الفساد
عبد السلام بلقشور، رئيس العصبة الاحترافية لكرة القدم، النائب الخامس لرئيس مجلس المستشارين، عضو مجلس الجهة، رئيس جماعة الزمامرة، الرئيس الفعلي لفريق نهضة الزمامرة، عضو الغرفة الفلاحية اللي طلع ليها بلا ما يشوف حتى فلاح و لي دار ليه الحملة صحيبو مخداد اللي كان يسميه خويا و حبيبي، و دبا كيطحن فيه و باغي تخلص منو…
بلقشور لي ناض مؤخرا عاطيها للتبوحيط فالفايسبوك و كيقول للناس انا غادي نستاقل من رئاسة الجماعة باش حكا نعطي فرصة للشباب، خدا الرئاسة ديال جماعة الزمامرة من 2009 حتى لدابا عاد تفكر الشباب ملي بداو التحقيقات مع البرلمانيين لي عندهم علاقة باموال البارون حمدون، كذب على مدينة كلها قال ليهم غادي نرجع معمل السكر كوزيمار، و نصب على دولة و استفد من ملايير المخطط الأخضر و ما زرع حتى لفتة، هاذشي كلشي عارفو و عارف الارض لي نصب بيها على الدولة، و لكن شكون يقدر يقول ليك كلمة ؟!
وا بلقشور، واش ما كتمركش ؟ الزمامرة مدينة التجارة و الفلاحة و الحرف رجعتيها منكوبة هاجروها اولادها بسباب طغيانك و ظلمك و سياستك الفاشلة، المجلس الجماعي و الميزانية درتيهم سلوم ركبتي عليه باش تاخذ المناصب، نتا تزادوك المناصب و الامتيازات و الزمامرة ماتزاد عليها تا حجرة، لا مدرسة لا سبيطار لا معمل، طحنتي الميزانيات في الخوا الخاوي، كتصرف حوالي مليار في السنة من فلوس الشعب على فريق الكرة ديالك، و ناس الزمامرة في الفقر و الشباب في البطالة….بحالا حاصهك غير الكرة…
خديتي أرض الجماعة كلها رجعتيها ملك للفريق، هدمتي الخزانة و دوزتي ملكيتها للفريق اللي انت كتملك الشركة الرياضية ديالو، سديتي روض الأطفال و قطعتي على الوليدات الصغار الما و الضو، و في الأخير دوزتيهم في ملكية الفريق، وخا كاين تضارب المصالح.
ملي بغات الدولة تبني مدرسة مالقاوش الأرض لأنك طحنتي العقار الجماعي في الخوا الخاوي، ماعمرك عطيتي سنتيم للسبيطار و لا لأي عمل اجتماعي، و كتحول من ميزانية التجهيز و كتعطي لفريقك باش تبان نجم و واعر في الإعلام. علاش اولاد الزمامرة كتخليهم يموتوا في الساقية اللي حولتي ميزانية التأمين ديال الحافتين ديالها لفريقك ؟؟ و النتيجة كانت الفاجعة لي وقعت قبل اسابيع، غرق شخصين فالساقية…
داير هاد الزبايل كلها و زايدها بالطغيان و الظلم على الناس، مجلس الجماعة دوراته مغلقة بقرار منك وجوج الأعضاء لي اعطى الله ديال المعارضة ما كتعطيهم حتى المحاضر ديال مقررات الدورات، واش الزمامرة فيرمة ديالك؟
و الخطير اللي غانفضحوه بالأسماء، هو سياسة الانتقام من ناس الزمامرة الشرفاء اللي وقفوا ضد طغيانك، اكثر من عشرين شكاية كيدية انتقامية ضد الشباب اللي كيعارضوك، و كتدير المحامين باش يتحكموا بالسجن و الغرامة على مجرد تدوينة في الفيسبوك.
حي القدس كلو بغيتي تهدم محلاتهم و تقطع ارزاقهم لأن السكان ديالو ما صوتوش عليك، تجزئة النصر و تجزئة الحسنية وقفتيهم عشرين عام حتى تبيع البقع ديالك و ديال اصحابك، كتستدعي لجنة التعمير من العمالة باش يسجلوا مخالفات بناء في حق منازل المعارضين ديالك، في حين انك انت نيت داير مخالفة البناء في الملك العام، و ولد خالك رئيس لجنة التعمير زايد طبقة غاير قانونية !
داير في كل قهوة بركاك، و واحد بموطور و تلفون كيصور ليك كلشي، في كل زنقة في كل شارع داير مخابرات ديالك تحصي الانفاس ديال الناس، داير عصابات من شرذمة ديال عديمات و عديمي الأخلاق كتحكم بيهم لبلاد بحال القايد عيسى بن عمر في ايامو.
قوليا علاش الباشوات ماكيكملوش عامين في الزمامرة و يطلبوا الانتقال بسرعة ؟
المجلس الأعلى للحسابات حصلك ضارب 600 مليون ديال مشروع مقر الجماعة اللي تبخرت، و ماداروا معاك والو.
قوليا انت اللي باغي يكون وزير نعاماس بلحيس الكابة لقجيعة وخنينيش و ما جاورهما، واش اللي نصب على خوتو في الورث ديال باهم و زور العقود ديال الأملاك و الحسابات البنكية و العقارات بالملايير اللي حكمت المحكمة ببطلانها، واش هذا يستحق يكون في شي منصب ؟ ماشي بلاصتو الحبس بتهمة التزوير و النصب و الاحتيال و خيانة الأمانة ؟ ارتاح شوية ا عبد السلام و ما تكطعش، مزال غا البداية هادي..
انظر ما تيسر من الحجج فالتعليق….
تا سير على بركة الله…
ميزانية إصلاح الساقية لي تحولت للنادي و كانت سبب في فاجعة غرق الشاب
