الفرشة – Lfercha واجبنا ضد الفساد
و طلع منتخب و نائب رئيس الجماعة كاع، سي المخزن دير خدمتك مع هاذ ولد شحيبر، و نتوما خوتي الفرشاويين عقلو ليا عليه تادوز هاذ المحنة…
ما موالفش نطلب منكم البارطاج و لكن هاذ خونا خاص شرو يطفى في أقرب وقت بإذن الله…
مجموعة ديال شباب متطوعين من اكادير، و ما اكثرهم من لي كيشرفو المغرب، قالو ارا نمشيو نوقفو مع خوتنا المكلومين، تناقشو كلا بشحال و باش ساهم و داو ذاكشي لي قسم الله باش يعاونو الناس المنكوبة فجماعة ادوكماض بالضبط إقليم تارودانت.
وصلوا للجماعة بعد جهد و مشقة، تسلط عليهم السيد لي فالصورة، فالاول قاليهم بأنه ولد المنطقة و شكرهم بغا يتطوع يتساعد معاهم باش يعرفو الناس المحتاجين و يوصلهم ليهم، كان كيبان كلشي مزيان…
داهم لواحد الدوار قاليهم عطوهم 20 مانطة فقط، وخدا ليهم الخيمات على اساس يعطيهم ليهم، لكن حطهم فطنوبيل عندو قال للشباب تانرجع لعندهم..
داهم لدوار اخر، غاتاجاو عندهم ناس داك الدوار كيحذروهم منو، و كيقولو ليهم هداك راه ش*فار كياخد المعاونات ماكيخليناش نستافدو، لكن الواعرة طلع كذلك هو نائب رئيس الجماعة سميتو عتمان بيغالن، وجايب معها مصور خاص كيوثق وقوفو جنب الضحايا زعما و هو كيتاجر فيهم ولد شحيبر في الوقت لي هو مسؤول على مساعدتهم و طلب مصلحتهم كمنتخب يا حسرة.
ملي تفضح قالو لو عطينا الخيمات، دار ليهم ديال كبور “وا خسااااااارتهم” قاليهم عطيناهم للناس، مشاو الشباب الله يعطيهم الصحة قلبو ليه السيارة لقاوهم فيها و خذاوهم، وخاف من دراري وهرب…
لي جا عندهم من الدواور المجاورة كلهم كياكدو نفس الشي عليه، فقرروا يرجعو للدوار لي منععهم يعطيوهم كلشي فالاول باش بتاكدوا ان المساعدات وصلتهم.
نفس المجموعة ديال الشباب لي بالمناسبة كنحييهم على شجاعتهم، تلاقاو فنفس الدوار بقافلة اخرى ديال صحفيين تعرضوا لنفس الشي من طرف شخص بنفس المواصفات كيقوليهم انه مقدم…
سير على بركة الله…
