الفرشة – Lfercha واجبنا ضد الفساد
قاليك اسيدي على لسان جون افريك طليقة رئيس جهة الشرق الشيفور عبد النبي البعيوي، البطل لي كان كيحلم يكبر و بغى ياخذ دور البطولة و يكيكي المالي و ياخذ بلاصتو و يدخل الاتجار فالبيضا للمغرب، لولا أن المالي رفض هاذ الطلب في اكثر من مناسبة، القصة ولات معروفة عند الكل دابا…
المهم طليقتو جات شهدت ضدو بتزوير رسوم عقارية كانت في اسم البارون المالي، منها الفيلا الفخمة ديال الناصيري و كذا، و لكن لي ما قالوهش و شارو ليه مصادرنا هو انها هي براسها بنت بارون صغير فالجهة الشرقية فالتسعينات، و هي لي كانت سبب غير مباشر فيما هو فيه اليوم، بعيوي كان مجرد خدام عندهم، كان زواج خالص مصلحة.
الواعرة هي ان جون افريك قالت كذلك ان البارون المالي اذا ثبتت روايته لي كيقول فيها انه تعرض لمؤامرة من طرف البيعيوي و الناصري، بحيث 40 طن لي شدو فالجديدة فالكاميوات ديالو لي في اسمو، كان سبق و باعهم للبعيوي خمس اشهر قبل، و بعيوي تعمد مايردش لي كارط كريز في اسمو حتى يدير لي فراسو، و الفرقة الوطنية لي بالمناسبة دارو خدمة نقية حسب شهادة الصحافة الدولية، لقات جوج من هاذ الكاميوات فعلا فاحدى ضيعات عائلة البعيوي، و معاها كميات من البيضا و حش.يش و فلوس الخ…لي بسببها داو خوه ذاك النهار عبد الرحيم البعيوي رئيس جماعة عين الصفا يوم 7 اكت.وبر، المهم جون افريك قالت إنه من الممكن البارون يخرج من الحبس دابا اذا طلع كلامو صحيح…بحكم ان هاذوك الكاميوهات لي في اسمو هي باش يطيحوه !
الوالي الجامعي لي كحلها فالجديدة قبل ما يمشي للجهة الشرقية و وهبي ما كانوش يتفارقوا مع بعيوي، و مصادرنا كتقول ان بعيوي كان مبرع ولد وزير من تحتها بالحديد الفاره و الكادوات، كنتمنى يمشي التحقيق الى ابعد مدى باش نردو ثقة المغاربة في عدالتهم و نبينو للعالم انها ماشي غير مجرد تصفية او انتقائية…
و سير على بركة الله….
