الفرشة – Lfercha واجبنا ضد الفساد
ترددت واش نبدى بهاذ القصة و لا بتريكة واكريم فاول منشور بعد الكونجي، و لكن قصة هاذ السيد تستحق الاولوية لأنها مستعجلة، ملفات واكريم كثيرة نخليوها لبعد الفطور ان شاء الله… شوفو دابا مثال حي كيفاش الحقوق كتضيع بسهولة فبلد الحق و القانون…
قصة السيد عياد ادونان نبداو بيها رمضان (فكندا) الله يدخلو علينا و عليكم مرة اخرى بكل خير يا رب، عامل مياوم كيقلب على عمل بالحلال ملي ما لقى عمل فمدينتو تاونات نزل يقلب على رزقو في الدار البيضاء، بغى يرهن شي دويرة تسترو هو و وليداتو و اهلو بشي بركة كان جامعها على سنوات، تسلطت عليه واحد العصا.بة داو ليه رزقو و جراو عليه من دار الرهين بالعن.ف و القوة ما كمل ديك العامين لي فالكونترا تا شاف مع الشما.كرية اولاد مول الملك الاستاد الجامعي المتقاعد في ضيعته و املاكه في سطات العذ.اب، مسكنهم معاه فالعمارة كل مرة خارج ليه واحد، حتى بيت الما حاشاكم ردموه ليه، اخر فصل دارو معاه طفاو عليه الما و الضو، قاليهم ياك لاباس ثاني مشاو جابو ليه فاكتورة مزورة ديال ليديك فيها 4000 درهم قالو ليه ساهم معانا، ارو ديك الفاتورة نشوفها لا، مشى عند ليديك قالوا ليه هاذ العقار لي جاي تسول عليه حنا مقيد عندنا خمس سنين ما خلص قبل ما تسكن نتا !!! خمس سنين و باقي ليديك ما قطعتش لا ما لا ضو، واييه انظر التعليق… !!
المهم طججوه بلا ما يردو ليه رزقو، مشى عند البوليس قاليهم يالله معايا غير ناخذ حوايجي و حوائج أولادي و أوراقي، قاليه الكوميسير السي فاضيلي هاذوك انا كنعرفهم نتا واقيلا نصا.ب و جراو عليه، حصة قرينة البراءة واقيلا ما قراوهاش لسي الكوميسيرذ، هز الدقة السيد و مشى عند القايد قاليه هذا ماشي شغلي شغل المحكمة، مشى للمحكمة حجز للنصا.ب على العقار بالحجج لي عندو، و عامين دابا و المحامي ديالو قاليك كيتسنى تحديد الجلسة، و السيد.درويش على باب الله كيصور 3190 درهم فالشهر ملي كيزيد السوايع، باقي كيتسال مبلغ اربع ملاين سنتيم، ربما قليلة عند مول الملك او عند كثير من الناس، و لكن هاذ السيد هي كل راس مالو تعب سنوات…
عامين هاذي ما كاينش لي حاشاها ليه، عندو حجج تحويلات ديال سومة الكراء، عندو العقد لي بيناتهم، عندو الحجز لي دار على العقار، امورو واضحة خاص فقط يتطبق القانون و ديما العصا السحرية كتوقف لهاذ الأستاذ النافذ ابن المحظوظة في هاذ البلاد المثقوبة…رغم الحجج الدامغة و رغم اللجوء إلى كل السبل القانونية لاسترجاع حقو…
يتبع…
سير على بركة الله…
