الفرشة – Lfercha واجبنا ضد الفساد
حلقة اليوم : صبوحة بنت سيليكا مول 24 مذكرة بحث، لي تكلفت بتصريف سلعة مسروقة بقيمة مليار و 700 مليون…
قبل يومين قدمت ليكم زعيم هاذ العصا.بة مول 24 مذكرة بحث المخبي في اكادير، المدعو ابراهيم لهياق و الملقب ب “سيليكا” ابو الثمان بنات، بين لي مقيد شرعي و لي لا، منهم بطلة اليوم، و لي طلع خوه صهر نائب الوكيل العام السابق بمراكش المتقاعد الشيخ الوالي بورحيم، اليوم غاندخلو فالمسكي، الضحايا و الأجهزة شدوا ورقة و ستيلو…موضوع طويل نسبيا و لكن ثيقوا بيا، ان شاء الله غادي ير.عب العصا.بة و يحرج المخزن…
و باش نبسط ليكم لا تيكنيك ديال هاذ العصا.بة، غادي نعاود ليكم كيفاش تم النصب على عشرات الضحايا منهم واحد من رجالات كازا لي كيشرفو البلاد، المخترع المغربي المعروف صاحب شركة المكيفات محمد بوحاميدي، لي نصبو عليهم في سلعة قيمتها مليار و 700 مليون…تجدون لائحة الضحايا و المبالغ المسروقة فالتعليق.
غانبداو من مول الشكارة لي كيمول هاذ النشاط الاجر.امي و دايرو كاستثمار فالنوار، و دار منو ثروة طائلة ماليها اول من آخر، فارم و شركات و عقارات و دروكريات…. المدعو عبد الله الخطابي…الصورة فالتعليق.
لهياق او سيليكا برفقة مول الشكارة الخطابي، عندهم comptable ديالهم فمراكش مدوز معاهم الحبس اسمو الوزاني، كيدبر ليهم على ضواسا شركات عندهم تواريخ تأسيس قديمة كيشريوهم، مثلا فهاذ الحالة الشركة كان اسمها Tlih Travaux، تجدون اعلانها فالتعليق، كان عندها عشر سنين و هي واقفة ما خداماش، و فراس مالها 20 الف درهم، و شدها هاذ الكونطابل قادها دار ليها الفيلتر، و رد ليها 100 مليون فراس المال و دار ليها الترانسفير لانفا بالدار البيضاء، و زوروا هيستوريك معاملات وهمية، المهم باش بنادم يدوخ و يثيقوا فيها الممولين اصحاب الشركات، و عندهم الطابع ديال certification de chèques كيزورو بيه شيكات الخلاص او (الضمان)، باقي لدابا البوليس ما عرفوش ماليهم، و يديرو على رأسها واحد معطل مكرد يخدمو بيه، وقتما تشد يمشي هو للحبس و يبقاو هوما وراء الستار، فهاذ الحالة ديال السي بوحاميدي و من معه، كان مسير الشركة من قلعة السراغنة، اسمو حكيم بيهوم، تجدون صورته فالتعليق تاهوا.
حتى لي صايب ليهم الموقع على انترنت ملي وصلو ليه الضحايا، قاليهم خلصوني كاش ما فراسي والو…
هاذشي لي حكيت لحد الان معروف عند الضحايا و عند المخزن و الصحافة، هاذشي كلو تنشر في هسبريس و الصحافة الوطنية بشهر ماي 2017 ، لكن الجديد و الحصري، هو فين تخزنات السلعة المسروقة و شكون صرفها…غير وسعو خاطركم…
ملي تفضحت القضية، تجمعت السلعة فديبوات فكازا و برشيد بصفة قانونية، قبل ما تهز و تمشي لديبوات فمملكة الهاربين اكادير، عاد سدو الشركة طبعا، وصلت الاخبار للضحايا و قالوا ليهم ان السلعة ديالكم مشات لديبوات فايت عميرة و سيدي بيبي، اخر سيارة بيكوب ديال الشركة طويوطا دخلت لاكادير و دازت كاع الباراجات رغم الحيحة لي كانت نايضة من طرف الضحايا، تجدون صورتها تاهيا فالتعليق، تاهيا تباعت فذيك الاسبوع، تبعوها تالتما لكن ما صورو لا حق لا باطل…و هنا فين وقفات التحقيقات و فين وقفت تا الصحافة…
من قاع الخابية، مصادرنا الموثوقة تؤكد انه بعد ما حيدو المصاريف لي حددوها في 200 مليون من مليار و 700، جا نصيب كل واحد فالعصا.بة 500 مليون سلعة، ثلاثة حقوق، الظريف لي دارو ليه الشركة ولد القلعة جاتو 500 مليون سلعة، هذا طلب لهياق يتكلف ليه بيها، قالوا هنيتك انا غانبيعها ليك بطريقتي، خذاها هي و حقو هو، يعني مليار سلعة، و 500 مليون سلعة لي جات في حق مول الشكارة الخطابي، هي فقط لي بانت ذيك الوقت و تبعوها الضحايا و الصحافة لسيدي بيبي و ايت عميرة…و ما صورو والو ضيعوهم وسط الدواور.
المليار ديال السلعة لي دا ابراهيم سيليكا صاحب 24 مذكرة بحث حقو و حق الكركوز لي دارو فالواجهة، مشات تفرقت فدروكريات مراكش و النواحي، تكلفت بيهم بنتو لي بلا اوراق لي مسجلة بكنية امها المدعوة صباح (صورة المنشور هي و باباها سيليكا)، بعدما ما دار ليها باباها شركة في مراكش عنوانها 190 تجزئة رياض المنارة، ازلي الجنوبي 2، مراكش، شركة ديال مواد البنااااااااء…
هاذ صباح غادي تشارك مع واحد معروف في مراكش اسمو حمو الفتاش (الصورة فالتعليق)، عندو تاهوا دروكريات كبار فيهم ديبوات فمراكش و النواحي..
قيد الشريف قيد… الديبو الأول كاين في تجزئة الخليل فالمحاميد، و الثاني دروكري معروف كاين في تجزئة ابن سينا فالمحاميد فمراكش، و الثالث في طريق ايت ايمور نواحي مراكش، و الرابع كاين في طريق اكافاي كذلك نواحي مراكش، و كلهم باسم الفتاش حمو شريك صباح بنت سيليكا ابراهيم لهياق الهارب، هوما لي تكلفو بتصريف السلعة المسروقة عبر شبكة من عشرات الدروكريات…
يتبع…
سير على بركة الله…
عبد الله الخطابي مول الشكارة، قبل سنتين فقط تم اعتقالو على شيكات و كان هاز معاه بطاقة تعريف وطنية مزورة و خرجوه من الاستئناف خير و سلام بعدما خلص الشيك ب 400 مليون
