الفرشة – Lfercha واجبنا ضد الفساد
كارطل أكادير، الحلقة الاولى من فضيحة النصب على الملك… قصة مارونا و اصل الداء…
فالصورة عبد الباسط عاشق، خريج البوليتيكنيك لي تاق فيه الملك و عطاه عدة مناصب فالشركة العامة للاستثمار، و لي من بينها مدير مارونا، الشركة ديال الصيد فاعالي البحار لي كان عندها عشرات المراكب قبل ما يقرر الهولدينغ الملكي انه يصفيها من بعد الانسحاب ديالو من مجموعة من القطاعات عقب اعتماد دستور جديد للمملكة…
عاشق خان ثقة الملك فاش كان مدير ديال مارونا من بعد عملية البيع، و بعد سلسلة ديال الاختلاسات لي قام بيها هو و عزيز عوباد (صاحب صمهنين) لي كان مجرد ربان فمارونا، و غادر باتفاق مع عاشق باش يدخل معاه فتخلويض كبير، مازال غادي نجيو ليه بالتفصيل.
قضية مارونا فضيحة كبيرة سرقو فيها الملك، مجموعة ديال النصابة تحت قيادة عاشق، الفرشة غادي تفرشها حصريا و لاول مرة فتاريخ المغرب، عبر حلقات غادي نتطرقو فيها لتشفارت و النصب لي تعرض ليه ملك لبلاد على يد كارطيل اكادير.
و أول فضيحة غادي نبداو بيها هو القالب لي دار عاشق باش يفوت المراكب بثمن بخس لصحابو، مقابل عمولات مالية تحت الطاولة.
عاشق دار قالب بلي شي واحد خدام فمارونا بغا يشري شي مركب غادي يستافد من خصم مهم، و هذا غا حيلة قانونية تدارت باش صحابو ياخدو المراكب برخص التراب، حيناش اصلا بنادم لي عندو ثمن مركب ماغاديش يخدم فمارونا اساسا.
ناضت العصابة طاحت على مستخدمين فمارونا دارت ليهم شركات و وقعوا على التنازل ديال الحصص ديالهم مسبقا، و بدون تسجيل، و عطاوهم الفلوس باش يشريو المراكب مقابل عمولات مالية.
هاد علال بوحامد و بوشعيب عوباد لي هو خو عزيز عوباد كانو خدامين فمارونا و شدو الفلوس من عند حسن ايد بيشو و عبد الهادي عمار و عزيز عوباد باش شراو زوج مراكب، خداو العمولة ديالهم و زادو مع الطريق.
من بعد عام تقريبا عزيز و حسن و عبد الهادي جبدو التنازلات لي كانوا عندهم ديجا و حولوا كلشي فالاسماء ديالهم حتى لهنا هاد النصب كولو قانوني، و لكن لي ماشي قانوني هو واحد البند موقعين عليه الناس لي شراو بالخصم، و هو ما تيبيعوش و مايفوتوش الاسهم ديالهم حتى تفوت ثلاث سنوات (انظر البند ثلاثة مكرر فالتعليق).
هاد شي تم بتخطيط من عبد الباسط عاشق لأنه هو لي كان الاكثر ذكاء فالعصابة، و كان عارف بلي مارونا غادي تصفى و ماغاديش يبقى لي يسولهم الا باعو قبل ثلاث سنوات.
الغريب فهاد شي كامل هو ان هاداك بوحامد باقي خدام اليوم أجير عند حسن ايد بيشو و عزيز عوباد، علما أنه هو لي باع ليهم زوج مراكب، و يمكن للدولة تتأكد من ان هاد بوحامد واخا شرا زوج مراكب و باعهم الا انه بقا خدام عند مالين الباركوات، و هذا شيء لا يصدق !!! كيفاش واحد شاري زوج مراكب و خدام ربان مركب عند الناس ؟
هاد القصة فاش الناس سولو عزيز عوباد عليها، جاوبهم بلي ماعند الملك مايصور منو، لأنه فيها تقادم، و لي اكد المعلومة هو المحامي فيصل لي كايسمسر ليهم فالمحكمة ديال اكادير.
هادو ناصبين على ملك البلاد عاد غادي يحنو فالناس ديال سيدي حجاج لي بغاو يديو ليهم الارض فكازا، ولا فاونطونيو الاسباني لي باعو ليه زوج مراكب على ظهروا كيسواو الملاير بجدريال و صيفطوه الله كريم لاسبانيا، ولا عشرات البحارة لي حتى الضمان الاجتماعي ماعندهمش …
يتبع…
سير على بركة الله….
