الفرشة – Lfercha واجبنا ضد الفساد
نتا السيد الكوميسير استقبلتي السيدة لي تعرضت للضرب و إتلاف لوازمها في محل عملها من طرف عائلة متعجرفة، كلشي موثق فيديو و تكلم عليها حتى الصحفي المهداوي كاع، (فيديو الاعتداء فالتعليق)، استقبلتيها فالمكتب ديالك و اعطيتها وقت، و اكتشفتي ان العناصر ديالك ما كلفوش نفسهم حتى يجيبو المتهم، حتى اعطيتي الأمر ديالك يحضروه في أقل من 24 ساعة، و قد كان !
و لكن ماذا وقع من بعد ؟ ما بقيتيش متبع الملف و لا صافي قلتي را القضية سكتت و هاذيك غير دريويشة ؟!
المهم، السي البوليسي الملقب بالشمكار، تهجم عليها مرتين و طردها من الكوميسارية مرة ثلث ايام بعد ما وضعت الشكاية جات تسول على مالها، و المرة الثانية ملي تواجهت فيها مع أفراد العائلة المعتدية، و جابت معاها الشهادة الطبية لي فيها 18 يوم، خرج عندها فباب الكوميسارية و قاليها عندك حل واحد هو ديري ليهم تنازل و تقبلي بذاكشي لي اعطاوك و الا را و الله لا صورتي شي حاجة و المخير في خيلك ركبيه !!!
واش اسي الكوميسير هاذشي فراسك؟
واش حقوق الدراوش ولات منتهكة في كوميساريتك لهاذ الدرجة ؟ و هاذشي و الموضوع شافوه المغاربة كلهم صوت و صورة و تكلم عليه أشهر صحافي فالمغرب !!! كون ما شافو حد اش كنتو غتديرو ؟!
غادي نتبعو الملف ان شاء الله و نشوفو واش نتا فعلا ولد الناس و ما كانش فراسك و لا نتا و البوليسي الشمكار ديالك على خط واحد…
شكرا…
سبر على بركة الله…
