الفرشة – Lfercha واجبنا ضد الفساد
سؤال لمن يهمه الامر في جهاز الامن الوطني…من قت*ل الشاب اسامة بالحاج ؟ و قت*ل معاه اسرتو كلها…
السيارة الرونج سبور موديل 2019 ضربت جوج شباب كانو على موطور الصيف الماضي فقط، اسامة لي كان القدام و كيستعد للانطلاق توفى فالبلاصة و صاحبو أيوب هزوه للانعاش كلو مدكدك، هاذشي وقع بالتحديد يوم 14 يوليوز 2022 في طريق عين الذياب الشاطئية على يسار مطعم اوكروفيت و غير بعيد على كاميرات ولاية الأمن الدار البيضاء الكبرى لي مجهزة بأحدث ما كاين فعالم الكاميرات الصنف المسمى بعين الصقر، و مع ذلك تعذر عليكم استخلاص الصور بذريعة ان الكاميرات كانوا طايحين وقت وقوع الحادثة، مع العلم انه نفس الكاميرات شدات حادثة وقعت فالجانب الاخر نصف ساعة قبل الحادثة الاولى، و رغم أن الام ديالو دارت مجهود كبير باش تتبع مسار الدراجة و السيارة و استاطعت تخرج صور السيارة من عند لاميزون هيونداي و من عند المطعم اوكروفيت (انظر الصور فالتعليق وحدة مستخرجة من كاميرا اوكروفيت و الاخرى من لاميزون هيونداي)، و الله ما لقيتوه و لا شديتوه !!!
هل يعقل تكون عند الأمن ديالنا كل هاذ المعطيات و صور السيارة و جوج ديال الرادارات لي دازت حداهم السيارة بسرعة خيالية، رادار اوطيل سويس و الرادار الرئيسي ديال عين الذياب ، و ما شدوش هاذ السيارة ؟ هل يعقل يدور عليكم العام و ما تشدوهش ؟!
ان صح ذلك فتلك مصيبة عظمى، و حنا رحنا محزمين بالخلا ماشي بالامن !
رجعو فتحوا تحقيق الله يرحم الوالدين، را الروح عزيزة عند الله…
يتبع و بالجهد…
سير على بركة الله…
