اسيدي غادي نعاودها ليكم بحال الحلمة ولكن هي بصح، حلو معايا هاد الروينة لي واقعة في مدينة سطات…

هذا واحد المركب سياحي في ملك بلدية سطات الاسم ديالو “كرين بارك” كان هو المتنفس الوحيد ديال وليدات المدينة، فيه بيسينات، خاص يدخلو ليه الشباب بثمن رمزي، من بعد 2011 عطى المجلس الجهوي للحسابات في تقرير ديالو باش يتكرى لشركة تكون معقولة او عندها تجربة في هاد المجال.

نضتي السي مصطفى الثانوي الرئيس الحالي او لي كان رئيس في ديك الولاية بين 2009 و2015، كريتيه لواحد الشركة اسمها green canalito لي باقا مستغلاه لدابا، ولكن هاد الصفقة ماغاداش تكون دازت خاوية (فيها ميمي بزاااف) مشروع كيدخل على الاقل خمسة دالمليون فاليوم تكرى ب 36ملين للعام، المنتزه لي المساحة ديالو 5 هكتارات تقريبا في وسط المدينة.

المهم الشركة لي كراتو مبقاتش كتخلص لكرا او رفعت دعوة على البلدية من طرف مسيرها عزيز وهبي، اوربح الجماعة بتعويض 700مليون باش اخوي المنتزه، وايييييه…

هاذ وهبي (الصورة) ماشي غير بوحدو فالمشروع، معاه شريك اخر اسمو ابو تنجال راه معتقل اليوم، ملي دخل الحبس ما بقتش عاقل على مرتو و اولادو ما كيوصل ليهم غير لي بغى كيموتو بالجوع، ناض الشريك المسجون دار وكالة لواحد البلطجي لي مشى هجم على البارك و بغى يسير بقوة يديه عوض ما يسلك الطرق القانونية…

المههم في هاد شي كامل نهار السبت مع الصباح حتى ناضت واحد الجوقة في المنتزه لي السبب ديالها واحد الشخص لي هو احمد الدريوش جاب عصابة ديالو و هجم على المحل بغى ادخل ليه صحة، حيت قالك اسيدي هو عندو وكالة مفوضة من عند الجيرو ديال هاد الشركة المعتقل في سجن عين علي مومن، و ادخلو المحل صحة و فوضى عارمة لي دارت الرعب في الساكنة .

لي بغيت نفهم او نفهمو كاملين هاد عزيز وهبي اشمن صفة ادعى الجماعة و ربح 700 مليون او هو ماشي مسير الشركة تفهم تسطى ؟

اوهاد سيد لعندو لوكالة احمد دريوش نضتي هجمتي على محل في ملك جماعي .ومستخدمين تصوط فيهم بدون حق ؟

المهم أمن سطات عجبوني فيهم و هبطو الزمر كامل عزيز وهبي و الدريوش لي جا هاجم بجوج بايتين فالبرودة….

سير على بركة الله …