تقرير حصري، نعم طويل و مشابك نسبيا و لكن كارطيل الصويرة غاينزل عليهم بحال القرط..اس و كانت خايفة نوصل و نفصل فهاذ التفاصيل…

الحجج تجدونها كلها فالتعليق…

تكلمنا كثير على كارطيل سميمو فالصويرة بزعامة السبيسيمان يوسف اخشخوش عضو الجهة رئيس الفريق التقدمي بمجلس جهة مراكش، و لاجودان رئيس مركز الدرك سميمو حسن البرنوسي، و نجم جديد غا نقدمو ليكم اليوم هو هذا لي فالصورة، اسمو ابراهيم ابناي، هذا هو المتهم الرئيسي فالواجهة فقضية اليوم، و هو الأخ الصغير و الوحيد ديال السيدة المسنة الضحية لي تكلمنا عليها صاحبة الورث و الأرض لي هج.موا عليها بمساعدة لاجودان و عصا.بتو و زورو المحاضر و كذا، القصة عاودتها ليكم في منشور سابق قبل اسبوعين ربما، و لحت ليكم الحجج و المحاضر و حتى الكاطكاط باش هجموا و حصلت فالغيس نشرتها ليكم… المهم هذا هو اخ المسماة المشتكية فاضمة ابناي الحاجة لي نشرنا صورتها تاهيا الله يرزقها و امهاتنا جميع الصحة و العافية، و لي قلنا كذلك انها خالة السبيسيمان يوسف اخشخوش… و ذكرت ليكم في اكثر من منشور يخص هاذ العصا.بة ان محركها و محفزها هو ورث بقيمة أكثر من 12 مليار، اليوم بإذن الله جا وقتو باش نعاود ليكم قصة نقطة من بحر تزوير هاذ القوم ديال جزء مهم من الورث المذكور…

اولا نذكركم بان هذا لي فالصورة هو الأخ الصغير للحاجة فاضمة ابناي ضحية هاذ القوم هي و خواتاتها الاربعة، بخمسة بيهم مهم ماشي مو، هو و خواتاتو جوجات من ام أخرى لي منهم ام الخشخوش و البرلمانية ختو لي تحديناها بالمناسبة تعطينا ملكية البيت فين ساكنين، هوما سبحان الله لي خذاو حقهم و حق غيرهم…

الموضوع شائك و معقد و كل مرة غادي نتكلم ليكم فيه على تفصيلة بالذات، من أجل كشف حقيقة المؤامرة المدروسة من طرف هاذ العصا.بة و منذ زمن بعيد…فوسعو خاطركم معايا لان الموضوع يستحق العناء باش تعرفو فين وصلت بلادنا و ادارتنا و عدالتنا، و كلشي غانحطو بالحجج…

تذكرون منشور الفرشة قبل حوالي شهر أو أقل على جريمة سرقة مذكرات الحفظ للعدلين و سجل التضمين بالمحكمة الابتدائية بالصويرة ؟! و قلنا واك واك الحق السجلات تسرقت و ما وقع والو، جريمة سرقة خطيرة من داخل المحكمة و القضية خرجت على فشوش…

وا اسيادنا احد العقود لي كانت مسجلة و موثقة فهاذ السجلات لي تسرقت فهاذ الجريمة، و لي لدابا باقي ما تدار فيها والو و باقي البحث عند قاضي التحقيق في استئنافية اسفي، هو عقد “صدقة” مزور، ماشي صداقة، لا، عقد صدقة يعني هبة او اعطية، بين المرحوم الحاج حماد ابناي والد هاذ المجر.م و كذلك والد الحاجة المشتكية و أخواتها الأربعة لي ما كان فراسو ما يتعاود على هاذ العقد، و بين المج.رم نفسه، يعني المج.رم لي كتشوفو فالصورة، زور عقد في حياة باه، يزعم ان باه تصدق عليه بالفران و الحمام و المنزل، و معهم محل تجاري و محلبة تاهي هرف عليهم واخا ما ذكرهمش فالعقد، و يزعم ان العقار ما عندوش ملكية، هاذشي و باه باقي حي ما فراسو ما يتعاود كما قلنا…

مشى وجه البلا سجلو و ملي داه للمحافظة لقى بلي العقار عندو رسم عقاري كاع و ماشي غير الملكية، و رقمو هو 26150م، ، ملي حصل و تورق، خبا ذاك عقد الصدقة و مشى عند كاتب عمومي دار عقد بيع عرفي اخر لنفس القطعة صاحبة الرسم 26150م، و عماه الله و ذكر فيها مساحة 181 متر مربع، في حين ذاك التيتر فيه 428 متر مربع، هاذشي غادي يعرفو ملي غايمشي مرة أخرى للمحافظة بعدما سجلو ثاني، و قاليه المحافظ لي كان كيعرف التيتر و قصتو مزياااان، بلي هاذ التيتر ماشي ديال الاب ديالك بوحدو و لكن را مشارك مع المدعو كروان مسعود، و كيفاش باك باعو ليك و انا على علم انه هو خدام كيفرق مع شريكو حاليا فهاذ العقار بالذات، و هاهو ملف التسوية عندي قدامي، يعني المحافظ السابق عرف بلي وجه البلا زور، و ما اتخذ معاه تا إجراء، و شد ليه الملف قاليه سير جيب باك بحال شي تلميذ فالمدرسة، و بدا كيحلب فيه مزياااان عاد اعطاه الضوسي و قاليه غبر عليا عمرك لا باقي تجي لهنا تانمشي انا فحالي، هاذ العقد را لا عاود بان غايصيفطنا كاملين الحبس، و فعلا تمت عملية قسمة المرحوم في حياتو مع شريكو للرسم العقاري 26150 م، احتفظ شريكو برقم الرسم الام، و خرج للمرحوم رقم رسم جديد لي هو 671/35.

ملي تأكد المجرم بلي خرج رقم رسم عقاري جديد لبدها واحد اربع سنين، و مشى دار واحد المصيبة ديال التزوير اكبر من مصيبة عقد.الصدقة لي ورت فيه باه حي، مشى دار عقد ملحق زعما تصحيحي باش يغطي على جر.يمة التزوير، يزعم فيه أن عقد البيع العرفي لي دار بتاريخ 1 غشت 89 كان غالط في رقم التيتر، و ان رقم التيتر الاصلي لي هو 26150م ليس هو الرقم الصحيح، و ان لي كان خاصو يكون مكانو هو الرقم الجديد ديال 671/35، و المصيبة الكبيرة هو انه تاريخ عقد هاذ البيع كان قبل خروج رقم الرسم بثلاثة اشهر، يعني نهار فااتح غشت 89 ماكانش شي رسم عقاري عندو رقم 671/35 فالوجود، و ما تخلق هاذ الرسم حتى لتاريخ 11 اكتوبر 89 !!!

ليس هذا فحسب، بل حتى المساحة طالها التزوير فالعقد الأول لان الرسم 26150م فيه 428 متر مربع و ليس 181 كما دون في عقده المزور.

الاب ديال هاذ وجه البلا غادي يلتحق بدار البقاء سنة 2001، و بقى خونا مستافد من هاذ الاملاك مستغلها الى غاية سنة 2017، خواتاتو مزوجات كلها فدارها مع اولادها، غادي تمرض وحدة من الخواتات الصغيرة فيهم ابناي السعدية، ملي طلبو خواتاتها من هاذ خونا يعطيها حقها باش يداويوها و يشريو ليها السكن، جمع و طوى و قاليهم ما كاين والو را قسمنا، و جبد ليهم مخارجة مزورة صاوبها سنوات من قبل، و فيها أرقام مراجع الأملاك كلها مزورة…

هاذي غادي نختم بيها منشور اليوم و بيها غانبداو الحلقة المقبلة ان شاء الله، الخواتات غادي يوكلو ولد ختهم الكبيرة الحاجة فاضمة ابناي ينوب عليهم بحكم السن و قلة الصحة، و غادي يلجؤوا للقضاء، و توضع شكاية بهاذ التفاصيل و الحجج لي غانشرو اليوم فهاذ الموضوع، و عوض ما يرجع لحق لاصحابو غاتبدى فصول أخرى من فصول الظلم و الخشونة، باش نعطيكم فكرة، مثلا فاخر مناسبة امام قاضي التحقيق قبل حوالي اسبوعين، ملي كيجي يوقف ولد خت الضحايا قدامو تيبدى يسخسخ فيه و يقوليه مالك مزغب، انا عكسنا من قبيل سير جيب مك و سير جيب خوالاتك يحضرو، رغم التوكيلات لي عند السيد و رغم مرض المشتكيات و سنهم المتقدم بزاف (المشتكية بلغت عقدها التاسع)، و رغم حصور الحجج لي تغني عن كل شد و جذب، و في نفس الوقت، هاذ وجه البلا، المتهم الرئيسي لا يكلف نفسه حتى عناء الحضور للتحقيق و كل مرة عذر فشكل، و ما كاينش لي سولو، في مشهد سريالي لا يمكن أن تراه الا في محاكم هاذ البلاد السعيدة…

يتبع….

سير على بركة الله…

عقد البيع العرفي

ملحق بعقد شراء

عقد الصدقة