الفرشة – Lfercha واجبنا ضد الفساد
هاديك القضية لي كان وهبي بغا يدير ديال تشري حبسك، راه ديجا تدارت فملف رأس الكارطيل حسن ايدبيشو و شريكو في النصب عبد الله الباعقيلي، قبل ما تضمس كيفاش؟
فاش الناس دارو الشكاية و القضية ديال تزوير محرر رسمي تفرشات لي كتبنا عليها، ناض حسن ايدبيشو طلب الخدمات ديال البرلماني السمسار المعروف عبد الصمد قيوح لي توسط ليه فالقضاء و جاب ليه خيارين احلاهما مر :
الخيار الاول هو 12 عام ديال الحبس، و الخيار الثاني هو مليار و ميتين مليون مقابل يتضمس الملف و يسالي عند قاضي التحقيق قبل مايدوز للجلسة.
حسن ايدبيشو و بحكم الملايير الممليرة لي كايدخل من البحر و النقل و التهريب و التهرب الضريبي، قبل يخلص مليار و ميتين مليون لي غادي يديها واحد الشخص فميكة كحلة لماليها، حسن ايدبيشو شرا 12 عام ديال الحبس بمليار و ميتين مليون اي مية مليون للعام، و الناس المتضررين خواو لما على كروشهم في انتظار ياخدو حقهم عند الله سبحانه و تعالى.
لسوء حظ حسن و عبد الله الملف طاح عند قضاة نزهاء فالنقض لي رجعو الملف حيتاش قاضي التحقيق دار عدم المتابعة دون تعليل، الله يحسن عوانو مسكين راه مليار و ميتين مليون كاتلف لي مايتلف.
دابا حسن ايدبيشو متابع بتهمة تقدر توصل العقوبة ديالها لعشرين عام حبيبيس، و مرغم انه يغبر بينما يلقاو تاني معامن يبيعو و يشريو فالمحكمة (الان هو حارج المغرب كما قلنا منذ اسبوع تقريبا) و حتى النيابة العامة مسكينة حنينة تابعاتو فحالة سراح دون تكليف نفسها حتى عناء سحب جواز سفره، الشيء لي عطاه فرصة يخرج من المغرب ربما باش يتكونسونطرا بينما يلقاو ليه التخريجة عاوتاني.
هادي الا دازت ليه طريفة غير نغسلو يدينا على القضاء فالمغرب و بلا مانبقاو نتسناو فيه شي تغيير لا من عبد النبوي ولا من عند عباس مول الفاخر …
يتباع…
سير على بركة الله…
