ياو راها مثقوبة…

رئيس الجامعة الملكية المغربية للشطرنج ، مصطفى أمزال ، مدان وطنيا و دوليا بالاختلاس و مازال فمنصبو، و المصيبة “الكحلاء” هو انه مازال عوال ينظم دوري دولي فالمغرب تحت الرعاية السامية لصاحب الجلالة !!!

دوليا، الشف**يفير مصطفى أمزال سبق وقفو الاتحاد الدولي للشطرنج 3 سنوات بتهمة تزوير ملفات حكم دولي سنة 2007، و وطنيا الشف**يفير سبق سحب من حساب الجامعة سنة 2006، 31 مليون كاش liquide بدون تبرير، في 2015 حول من حساب الجامعة لحسابو كثر من 100 مليون بلا خبار أعضاء المكتب، و سحب سنة 2016، 84 مليون تاهيا كاش بلا خبار المكتب، غير الكاتبة وحدها سحبت تاهيا ما كاين غير الكاش ليكيد 580 مليون، و قالت عطاتها لو كاملة، و في سنة 2015 جمعت الكاتبة 120 ألف دولار واجبات المشاركة في بطولة عربية و عطاتها تاهيا الرايس كلها، و ما بان ليها اثر ، كلها تصرفات درهم في السوق السوداء.

من 2013 الى 2016 شد واجبات التأمين على اللاعبين و ما دارش التأمين و المحكمة ميكت على هاد الجريمة.

في 2018 البوليزاريو دخل الكنفدرالية الإفريقية للشطرنج و هو بقا يتفرج و ما دار حتى إجراء.

حكمت عليه المحكمة بناء على تقارير عدة بكل ما جئنا به بست أشهر موقوفة التنفيذ في إطار الجدية و ربط المسؤولية بالمحاسبة و ذاكشي…

با صطوف عندو ناس كيتدخلو لصالحو في المحاكم ديال الدار البيضاء، بغينا غير نعرفو من بعد الشي لي وقع في محاكم الدار البيضاء ، كاين لي غادي يتجرأ يوقف معاه في محكمة الاستئناف ؟

واش اعباد الله وهو محكوم بخيانة الأمانة والتزوير يسعتد لتنظيم دوري بإسم ملك البلاد وتحت رعايته السامية ؟!

وايلا قلنا مثقوبة كيتقلقو شي وحدين ؟!

سير على بركة الله…